F’ċerimonja fil-Palazz Presidenzjali l-Belt, dalgħodu ħa l-ġuramen tal-ħatra bħala Imħallef, Lawrence Mintoff. Huwa ħa l-ġurament fil-preżenza fost oħrajn tal-President ta’ Malta Marie-Louise Coleiro Preca, l-Prim Minsitru Joseph Muscat, il-Prim Imħallef Silvio Camilleri u l-Avukat Ġenerali Peter Grech.
Wara li ħa l-ġurament l-Imħallef Lawrence Mintoff tkellem dwar l-importanza li l-kawżi m’humiex proċessi ta’ karti jew numri, izda huma nies li jispiċċaw quddiem il-Qorti minħabba sitwazzjoni diffiċli. Wiegħed li hu se jkun qed iżomm dan f’moħħu.
L-Imħallef Mintoff qal li hu ġej mill-kamp kummerċjali u f’dan il-ġustizzja tidħol ukoll. Żied li meta ġudikant jiġi biex jiddeċiedi, irid iqis is-sitwazzjonijiet umani.
In-nomina ta’ Dr Lawrence Mintoff bħala imħallef tħabbret il-bieraħ. In-nomina tiegħu ġiet approvata mill-kabinett.
Dr Mintoff li għandu 54 sena, laħaq avukat 30 sena ilu u fost oħrajn ħadem fl-uffiċċju tal-Avukat Ġenerali u fl-uffċċju legali tal-Mid Med Bank u tal-Malta Enterprise.
Il-ħatra tiegħu fil-bank tal-ġudikatura hija s-sitt waħda f’din il-legislattura wara li diġa inħatru żewġ imħalfin u tliet maġistrati.
The post Jieħu l-ġurament tal-ħatra l-Imħallef Lawrence Mintoff appeared first on TVM.