Is-Segretarju Parlamentari għall-Innovazzjoni, Riċerka, Żgħażagħ u Sports, Chris Agius ħabbar li l-Gvern identifika biċċa art viċin xi bajja f’Malta biex jiżviluppaha f’żona bir-ramel biex fiha jibda jiġi prattikat diversi sport. Is-Sur Agius qal li ż-żona bir-ramel mhux ser tkun fuq il-bajja nnifisha iżda l-proġett se jsir viċin biex din tkun tista’ tintuża fis-sajf kif ukoll fix- xitwa minn għaqdiet li jipprattikaw sport differenti fosthom il-fubol, handball u volleyball fuq ir-ramel.
Is-Sur Agius qal dan filwaqt li ħabbar li l-Kumitat Olimpiku Malti flimkien mal-Aġenzija Żgħazagħ għall-ewwel darba ser jorganizza erba’ sigħat ta’ sports fuq ir-ramel. Din l-attività bis-sehem ta’ mill-anqas seba’ organizzazzjonijiet sportivi ser tittella’ nhar it-Tlieta li ġej fil-Bajja tal-Għadira fil-Mellieħa.
Il-Kumitat Olimpiku Malti organizza din l-attività biex iħajjar aktar żgħażagħ jipprattikaw l-isport filwaqt li l-Aġenzija Żgħazagħ li ser tkun qed tiċċelebra l-Jum Dinji taż-Żgħażagħ ser tieħu sehem biex tiġġieled l-obeżità fost iż-żgħazagħ.
Fl-attività sportiva ser ikunu organizzati logħob tal-volleyball, futbol, handball, badminton u anki golf flimkien ma’ esebizzjonijiet tal-karate u zumba.
Din l-attività ser tittella’ fit-12 ta’ Awwissu bejn is-7.00 u l-11 ta’ filgħaxija fil-bajja tan-nofs, tal-Għadira. Il-Kumitat Olimpiku Malti ser jara li l-bajja ser tkun mgħammra b’dak kollu meħtieġ biex ikun jista’ jkun prattikat l-isport minn kulħadd mingħajr ebda ħlas.
The post Identifikata żona viċin bajja li ser tinbidel f’arena sportiva appeared first on TVM.